ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានលើកឡើងថានៅថ្ងៃខាងមុខនឹងអាចលេចចេញនូវអគារកម្ពស់ ៥៥៥ម៉ែត្រដែលជាអគារខ្ពស់ជាងគេនៅក្នុងប្រទេសសាងសង់នៅលើកោះនរា។

ថ្លែងនៅក្នុងពិធីសម្ពោធដាក់ឲ្យប្រើប្រាស់ជាផ្លូវការស្ពានភ្ជាប់កោះនរាទៅកោះពេជ្រនារសៀលថ្ងៃពុធ ទី១៥ ខែវិច្ឆិកា ឆ្នាំ២០២៣ សម្ដេចធិបតី ហ៊ុន ម៉ាណែត បានថ្លែងថាកោះនរាហាក់បីដូចជា វេទមន្តមួយដែលបានជប់ឲ្យបានលេចរូបរាងឡើងជាថ្មី នៅលើទន្លេមេគង្គក្នុងរាជធានីភ្នំពេញ ហើយទៅថ្ងៃមុខក៏នឹងមានអគារដែលខ្ពស់ជាងគេកម្ពស់ ៥៥៥ម៉ែត្រនៅលើកោះមួយនេះផងដែរ។

គួរឲ្យដឹងផងដែរថាបច្ចុប្បន្នអគារដែលមានកម្ពស់ខ្ពស់ជាងគេនៅតំបន់អាស៊ានគឺអគារម៉ាដីកា១១៨ នៅទីក្រុងគូឡាឡាំពួរ ប្រទេសម៉ាឡេស៊ី ដែលមានកម្ពស់ប្រមាណ ៦៧៨ម៉ែត្រ ខណៈអាគារ Landmark 81 មានកម្ពស់ ៤៦១ម៉ែត្រជាប់ចំណាត់ថ្នាក់លេខ២ នៅអាស៊ាន៕